کەیفیە.. کچەکا ژ مالەکا هەژار بۆ پەرستار و چالاکڤانەک بۆ هاریکاریکرنا هەژاران
تقارير

کەیفیە.. کچەکا ژ مالەکا هەژار بۆ پەرستار و چالاکڤانەک بۆ هاریکاریکرنا هەژاران

کەیفیە.. کچەکا ژ مالەکا هەژار بۆ پەرستار و چالاکڤانەک بۆ هاریکاریکرنا هەژاران

 ل درێژاهیا دیرۆکێ دا ژن وەکو زێدەترین چین یان ڕەگەز ل جڤاکێ ڕۆژهەڵاتا ناڤین دا ڕووبەڕوی نەهامەتی و ئێش و ئازاران و توندوتیژیێ بوویە و هەردەم ژی زۆرداری و نەخۆشی دیتینە، تایبەت ژی ل جڤاکا ئێزیدی دا هەر دەم ژن پترین قوربانی دایە و ل دەما هەر کارەسات و ڕووداوەکا نە خواستی ژنا ئێزیدی تووشی زولم و زۆرداری و نە ماف پەروەریێ بوویە  .

 سەرەڕای ڤان هەموو نەخۆشی و ئازاران لێ هەر جار ژنا ئێزیدی ب هێز و شیان ڤە رابوویە سەر پێیان و شەڕ لسەر مافێن خوە یێن ڕەوا کریە و بوویە سیمبولا ئاشتی و ئازادیێ ل ناڤ گەل و مللەتێ خوە دا و خواستی یە کو هاریکاریا کەسێن دی بکەت و ژ خێزان و مالباتا خوە رە دلۆڤان و بێ تەخسیر بوویە.

کەیفیە عبدالله کچەکا 23 سالی یا خەلکێ ناحیە سنونێ یە ل باکوورێ قەزا شنگالێ سەرەڕای ژیانا سەخت و هەژاریێ بەلێ دنهوە دا وەک پەرستار و چالاکڤانەک بۆ خواستنا مافێن کەسێن دی و هاریکاریکرنا هەژاران و کێم دەرامەتان کاردکە کو دنهوە دا ل کەمپا شاریا ل سنوورێ قەزا سێمێلێ ل. پارێزگەها دهۆکێ دگەل خێزانا خوە یا 4 کەسی دژیت.

ئەڤ کچە وەسا چیرۆکا ژیانا خوە ڤەدگێرە و دبێژە، پێش سالا 2014ێ ژیانا مە هەر ب زەحمەت چونکی ئەم ئێختیم بوون و پاریێ ژیانێ ژی بۆ مە ب زەحمەت بوو و ل دەمێ هێرشا تیرۆرستێن داعش بۆ سەر شنگال و دەوروبەران وەکو هەموو خەلکێ دگەل خێزانا خوە بەرێ خوە دا چیایی و هەیاما نێزیکی هەفتیەکێ ب تیهنی و برسی و د سەقایەکی گەرم و نەخوەش دا و دوور ژ هەر تشتی مە ژیان دەرباس کر ل پشت را ژی ب هاریکاریا چەند کەسان ئەم گەهشتنە هەرێما کوردستانێ و ئەم ل کەمپان دا جێگیر بوون.

ئەڤ کچە ژبەر مرنا بابێ خوە و ژبەر کو تنێ خویشکا سێ برایان بوو و هەر سێ ژی ژ وێ پچووکتر بوون دژیێ کێمتر ژ 10 سالیێ دا نەچار بوو کار بکەت و هەتا نهوە ژی هەر پشت ب خوە و شیانێن خوە دبەستیت.

ژیانا ئاوارەیێ و زەحمەتێن وێ پشتی جێگیر بوونا وان دکەمپان دا ژی و سەرەڕای کو قوتابی بوو بەلێ ژبەر برێڤەبرنا ژیانێ و خوەدانکرنا هەر 3 برا و دایکا خوە نەچار بوو کار بکەت و ل وی دەمی دگەل رێکخراوا Save The Children کار کر و دگەل دەواما خوە یا قوتابخانێ مەجبوور بوو کو برێڤە ببە و جار جاران ل گۆڕی گۆتنا وێ نە دگەهشت وانەیێن خوە وەکو پێدڤی بخوینیت ژبەر ژ دەواما رێکخرواێ دزڤری بۆ دەواما قوتابخانێ دچوو بەلێ پا سەر خاترا دایک و برایێن خوە ئەو یەکە دکر پێخەمەت وان ب شێوەیەکی باش و ژیانەکا خوەش خودان بکەت، کەیفیە یا 23 سالی وەسا دبێژە.

کارکرن و خواندن دگەل هەڤ پێخەمەت هاریکاریا خێزانێ هەروەها ئاماژە ب وێ چەندێ ژی کر، ل پشت را ئەز دەرچووم بۆ پۆلا 6ێ ئامادەیی لێ ژبەر کو ئەز گەلەکا پێدڤی بووم هەر من بەردەوامی دا کارێ خوە کو هەڤالێن من ژی زۆر هاریکار بوون کو ژ رێکخراوێ دهاتم دەمژمێر 12 و نیڤ بلەز و ب غاردان دچووم بۆ قوتابخانێ. سەرەڕای کو کەیفیە قوتابیەکا زیرەک و چالاک ژی بوو بەلێ پا ژبەر بارودۆخێن کو تێدا دەرباس دبوو و ئەو کارێ دکر لگۆری شیانێن خوە پلەیا 80 بدەست خوەڤە ئینا و ل پشت ڕا ژی ل پەیمانگەهێ بەشێ پەرستاری هاتە وەرگرتن و ل سالا خواندنێ یا 2018-2019 ب سەرکەفتیانە ب دویماهی ئینا کو لگۆری گۆتنا کەیفیە ژبەر بارودۆخێن ژیانێ وێ نەشیا بچتە وی بەشێ کو دڤیا ژبەر کو ل هاڤینێ کار دکر دا کو مەزاختیێن دەواما خوە پەیدا بکەت ل پەیمانگەهێ.

کەیفیە ئەو ژی دیارکر کو هەردەم دایکا وێ پشتەڤانیا وێ دکر و دنهوە دا ژی ئەو مەزنترین پشتەڤانە بۆ وێ و ب هیمەتا وێ ئەو گەهشتیە ئەڤێ قۆناغێ. دنهوە دا کەیفیە دگەل ڕێکخراوا Free Yazidi کاردکەت و ب وێ رێکێ خزمەتا جڤاک و خەلکێ خوە دکەت و ئەو دبێژە من دڤێت هەردەم بەرەڤانکەر و پشتەڤانا هەژار و ژنان بم کو ئەو ب کۆمەکا هەڤالێن خوە رە لژێر ناڤێ گرۆپێ دەنگێ گەنجێن شنگال ل هەموو هەلکەفت و جەژنەکێ پارەی کۆم دکەن و ژ دەف خوە ژی ددەن و هاریکاریان پێ دگەهیننە وان مالێن کێم دەرامەت و هەژار پێخەمەت برێڤەبرنا وان هەلکەفتان و داکو ئەو خوە دناڤ کەسێن دی دا کێم نەبینن. کەیفیە دبێژە هیڤیا دلێ من کەیف خوەش کرنا هەژارانە ژبەر کو من ژی گەلەک هەژاری دیتیە.

 ژن دنێرینا کەیفیە دا هەروەها ئاماژە ب وێ چەندێ ژی ددەت کو ژن هێزا هەرە مەزنە و ژنا ئێزیدی گەلەکا خوە ڕاگرە و هەموو ئاستەنگی و نەخوەشیان دشێت دەرباس بکەت لۆما دخوازم کو چ جارا خوە ڕادەست نەکەن و بەردەوام بن ل هەول و بزاڤان دا ژبەر کو هەر دێ سەرکەڤین. کەیفیە ب هیڤی یە ژی کو فێری زمانێن ئیسپانی و فەرەنسی ببێت کو نهوە هەرسێ زمانێن کوردی، عەرەبی و ئینگلیزی ب باشی دزانیت دا کو پتر خزمەت جڤاکا خوە بکەت ب رێکا کارێ خوە یێ مرۆڤایەتی.

 

لیث حسین